Descripcion
« E l’ivern siguet aquí coma lo faucon per esfredar las surilhs pel país, coma lo lop per eissajar la relha de sos enemics. Coma un pòrtabala menet tots sos abits blancs e sas dentelas e los eschampilhet pertot en far lo torn, per las ribas brodosas de las trenchadas, per las rotas esbolhadas, per lo rastolh lonhdan de las estiadas, menet sas istòrias de giure e de ròla dins de petitas pòchas sens cap de chaença, dins las rimadas de la terra, essatget d’èsser pus gente que la prima, vestissent de belas ropas blanchas e luquetantas los aubres que semblavon de dròllas, ondret tendrament d’una daurada murtriera la beutat de tota causa, las flors sauvatjas del semetial sautant coratjosament quauquas bandieras nècias de roge e de rosse. D’un còp de tron e sens un marmus faguet se’n tornar la saba dins chada causa verda que demorava apres la lonja destruccion daus òmes en guerra. »
Poèta, romancier e autor plan conegut de teatre, l’irlandés Sebastian Barry es nascut en 1954. Conta dins ’Na lonja lonja viá la guerra de Quatòrze daus Irlandés, venguda enquera mai estranha e tarribla apres las « Paschas sagnosas » de 1916.
Lo Willie Dunne, partit la flor al fusilh, e al còr l’amor de sa Gretta, descrubirá redde que ren es simple, e mai qu’Irlanda, los òmes e lo monde son cap de pial coma los aviá totjorn vists.
Joan-Peire Lacomba a desjà revirat en ’quò de Letras d’Òc La pèrla de John Steinbeck e publicat un recuelh de novelas, Daus vistons dins la nuech ; e chas d’autres editors, en lenga d’òc, tres recuelhs de poèmas e una revirada.
